Karl I. (Neapel)

Karl I. (Neapel)
König vo Sizilie, Neapel und Albanie; Brinz vo Achaia; Groof vo Provence, Forcalquier, Anjou und Maine
Regierigsziit	6. Januar 1266 – 7. Januar 1285
Uf d Wält cho	21. Merz 1227
Geburtsort	Frankriich
Gstorbe	7. Januar 1285
Dodesort	Foggia
Vorgänger	Manfred
Nochfolger	Peter I. (Insle vo Sizilie) Karl II. (die andere Gebiet)
Verhürotet mit	Beatrice vo Provence Margarete vo Burgund

Dr Karl I. vo Anjou (franzöösisch Charles d’Anjou, italienisch Carlo d’Angiò; * Merz 1227; † 7. Januar 1285 z Foggia, Apulie) isch dr jüngschti Sohn vom französische Köönig Ludwig VIII. († 1226) und dem sinere Frau Blanka vo Kastilie gsi. Er isch vo 1266 aa Köönig vo Sizilie gsi. Noch 1282 isch si Herrschaftsgebiet uf dr festländisch Däil vom Köönigriich beschränkt gsi, dr Ditel isch aber gliich bliibe. Er isch dr Stammvater vom eltere Huus vo Anjou, eme Sitezwiig vo dr franzöösische Herrscherdünastii vo de Kapetinger.

Dr Karl het s Köönigriich Sizilie vo de Staufer erooberet und het im östlige Middelmeerruum Land erworbe. Er het e Chrieg gege s Byzantinische Riich blaant, aber d Byzantiner häi 1282 z Sizilie en Ufstand aazettlet, d Franzoose uf dr Insle si massakriert worde und dr Peter III. vo Aragon het d Herrschaft dört übernoo.

Mit siner Hüroot zur Beatrice, dr Erbin vom Raimund Berengar IV. vo Provence, isch dr Karl 1246 Groof vo dr Provence und vo Forcalquier worde. In 1247 het em si Brueder, dr Ludwig IX., d Groofschafte vo Anjou and Maine gee, wo franzöösische Chroondomääne gsi si. Dr Karl het Albanie erooberet und sich 1272 zum Köönig vo Albanie usgrüeft. 1277 het er d Köönigschroone vo Jerusalem kauft und in sim Testamänt het em dr Wilhelm II. vo Villehardouin 1278 s Fürstedum Achaia hinderloo.

Dr Karl isch e grächte aber herte Herrscher gsi. Er het die sogenannti Latiinischi Rönessans understützt. Under iim häi jüüdischi Gleerti klassischi und arabischi Teggst übersetzt und so em Weste wider zuegänglig gmacht.